प्यूठान । झिमरुक गाउँपालिका वडा नम्वर १ मा तिनदिने उद्घोषण कला सम्वन्धी तालिम मंगलवार सम्पन्न गरिएको छ । वडामा रहेका युवायुवतिलाई लक्षित गरी तालिम संचालन गरीएको हो ।
झिमरुक गाउँपालिका वडा नम्वर १ को आयोजनामा सम्पन्न तालिममा स्थानीय १२ जना युवायुवतीको सहभागीता रहेको थियो । तालिममा उद्घोषण के हो ?,उद्घोषण गर्दा आवश्यक पर्ने ज्ञान तथा शिप,ध्यान दिनुपर्ने विषय उद्घोषकमा हुनुपर्ने गुण तथा कुशल उद्घोषक बन्नका लागि अपरिहार्य विषयहरुका विषयमा प्रशिक्षण दिईएको थियो ।
तालिम समापन समारोह तथा प्रमाणपत्र हस्तान्त्रण कार्यक्रममा बोल्दै वडा अध्यक्ष धु्रवराज खनालले तालिममा सिकेका विषयवस्तुलाई व्यवहारमा परिणत गर्न सहभागीलाई आग्रह गर्नुभयो । युवाहरुको क्षमता अभिवृद्धिलाई ध्यान दिदै तालिम आयोजना गरीएको बताउँदै उहाँले तालिममा सिकेका कुराहरु व्यवहारमा लागु गरेमात्रै तालिमको उपयोगिता हुने बताउँनुभयो ।
यस्तै वडा सदस्य शंकर प्रसाद पोख्रेलले तालिमले युवाहरुको नेतृत्व विकासमा सहयोग पुग्ने बताउँनु भयो । कार्यक्रममा नेपाल पत्रकार महासंघ प्यूठानका सचिव तथा प्रशिक्षक बासुदेव गिरीले सिकेका शिपलाई व्यवहारमा उतार्न सुझाव दिनु भयो ।
आईतवार देखि संचालन भएको तालिमको सहजिकरण पत्रकार प्रज्वल पहाडी र बासुदेव गिरीले गर्नुभएको थियो ।
