प्यूठान । प्रगतिशिल युवा विकास समाज नेपाल नौबहिनी गाउँपालिका ६ लुङको आयोजनामा तिजगित प्रतियोगिता सम्पन्न भएको छ । वडा अन्तरगत रहेका स्वास्थ्य आमा मसमुहको सहभागीतामा शनिवार नौबहिनी गाउँपालिका ६ लुङ पोखरामा प्रतियोगिता सम्पन्न गरिएको हो ।
सातवटा स्वास्थ्य आमा समुहको सहभागीता रहेको प्रतियोगितामा अमरापुरी स्वास्थ्य आमा समुहले प्रथम स्थान हासील गरेको छ। यस्तै सृजनशिल स्वास्थ्य आमा समुह द्धितिय र मातृशिशु स्वास्थ्य आमा समुह तृतिय स्थान हासिल गर्न सफल भएका छन् ।
विजय समुहलाई नगद सहित प्रमाण पत्रले सम्मान गरिएको छ । प्रथम, द्धितिय र तृतियलाई क्रमश रु ८ हजार, ५ हजार र ३ हजार नगद सहित प्रमाणपत्र उपलव्ध गराईएको संस्थाका अध्यक्ष प्रज्वल पहाडीले जानकारी दिनुभयो ।
कार्यक्रमका प्रमुख अतिथि नौबहीनी गाउँपालिकाका उपाध्यक्ष विस्ना थापाले विजयी समुहलाई प्रमाण पत्र तथा नगद पुरस्कार प्रदान गर्नु भएको थियो । स्थानीय कला संस्कृतिको संरक्षणमा संस्थाले विगत देखिनै विभिन्न कार्यक्रमहरु संचालन गर्दै आएको संस्थाका अध्यक्ष प्रज्वल पहाडीले जानकारी दिनुभयो ।
समाज परिवर्तनमा महिलाको भूमिका महत्वपूर्ण : प्रमुख अतिथि थापा
तिजगित प्रतियोगितालाई सम्वोधन गर्दै प्रमुख अतिथि थापाले समाज परिवर्तनमा महिलाहरुको भूमिका महत्वपूर्ण रहने बताउनु भएकोछ । घरपरिवार देखी सामाजिक परिवर्तनमा महिलाको भूमिका अर्थपूर्ण रहने औल्याउँदै उपाध्यक्ष थापाले त्यसका लागि महिला शिक्षित हुन आवश्यक रहेको बताउनु भयो ।
“हाम्रो घर परिवार र समुदाय कस्तो बनाउँने भन्ने हात महिलामा हुन्छ” उपाध्यक्ष थापाले भन्नुभयो, “त्यसका लागि सवै महिला शिक्षित हुन आवश्यक छ ।” शिक्षा र स्वास्थ्य विकास र परिवर्तनका मुख्य आधार रहेको औल्याउँदै उहाँले त्यसलाई जोड दिन आग्रह गर्नुभयो ।
मेला र विभिन्न पर्वहरुको संरक्षण गर्नुपर्ने दायित्व सवैको रहेको बताउँदै उहाँले विना तडकभडक सास्कृतिक पक्षको जगेर्नामा जुट्न आग्रह गर्नुभयो ।
कार्यक्रममा नौबहिनी गाउँपालिका ६ का वडा अध्यक्ष मान बहादुर के.सी.ले गाउँको विकासका लागि सवैपक्षले सहकार्य गरी अघिवढ्नु पर्ने बताउँनुभयो । यस्तै संस्थाका पूर्व अध्यक्ष तिलविक्रम के.सी.ले स्थानीय संस्था तथा नागरिक समाजलाई टिकाई राख्न स्थानीय सरकारको मुख्य दायित्व रहेकोले त्यसतर्फ ध्यान दिनुपर्ने सुझाव राख्नुभयो ।
