प्यूठान । नेपाल सरकारका कृषि तथा पशुपक्षि विकास मन्त्री रामनाथ अधिकारीले विश्व पशु दिवस प्यूठानको स्वर्गद्धारीमा मनाउने घोषणा गर्नु भएको छ । आईतवार स्वर्गद्धारी नगरपालिका अन्तरगत कृषि तथा पशुपक्षि सेवा केन्द्रको नवनिर्मित भवनको उद्घाटन गर्दै उहाँले नगरपालिकाको व्यवस्थापनमा मन्त्रालयले राष्ट्रिय उत्सवको रुपमा दिवस आयोजना गरिने बताउँनुभयो ।
दिवसको अवसरमा स्वर्गद्धारी आश्रममा रहेका गाईहरुलाई आहार व्यवस्थापन सहित विभिन्न रोगको परिक्षण सेवाको व्यवस्थापन गर्ने समेत उहाँले बताउँनुभयो । हरेक वर्षको अक्टुवार ४ मा विश्व पशु दिवस मनाउँने गरिन्छ । यो वर्ष असोज १८ गते अर्थात बडादशैंको २ दिन पछि दिवस पर्ने भएकोले मन्त्रालयको आयोजना र नगरपालिकाको व्यवस्थापनमा दिवस मनाईने मन्त्री अधिकारीले बताउनुभयो ।
ग्रामीण उद्यम तथा आर्थिक विकास आयोजना बुटवलले स्वर्गद्धारी नगरपालिकामा निर्माण गरेको कृषि तथा पशुपक्षि सेवाकेन्द्र भवनको उद्घाटन गर्न मन्त्री अधिकारी प्यूठान आउँनु भएको हो । मध्यपहाडी जिल्लाका करीब साढे ३ सय पालिकामा सेवा केन्द्र स्थापना गर्ने योजना रहेको उहाँले बताउनुभयो ।
पशुपालनको क्षेत्रलाई व्यवसायिक बनाउँदै स्वर्गद्धारी आउँने पर्यटकलाई लक्षित गरि दुग्धजन्य पदार्थ उत्पादनमा जोड दिनुपर्ने उहाँको आग्रह थियो ।
