बीबीसी । एप्पलले पछिल्लो ६ वर्षमा १०० भन्दा धेरै नयाँ कम्पनी खरिद गरिसकेको कम्पनीका कार्यकारी प्रमुख टिम कुकले खुलासा गरेका छन् । यसको अर्थ एप्पलले प्रत्येक तीन हप्तामा एउटा कम्पनी किन्ने गरेको मंगलबारको शेयरहोल्डर बैठकमा कुकले बताएका हुन् ।
एप्पलले हालै मात्र अहिलेसम्मकै सबैभन्दा ठूलो चौमासिक आम्दानी डेलिभर गरेको थियो । २०२१ फिस्कल वर्षको पहिलो चौमासमा कम्पनीले १११.४ अर्ब डलर ल्याएको हो । कुकका अनुसार कम्पनी अहिले नयाँ प्रविधि र क्षमता लिनमा केन्द्रित भइरहेको छ ।
पछिल्लो दशकमा एप्पलले ग्रहण गरेको सबैभन्दा ठूलो कम्पनी ‘बिट्स इलेक्ट्रोनिक्स’ रहेको थियो । हेडफोन निर्माण गर्ने यो कम्पनीलाई एप्पलले ३ अर्ब डलरमा खरिद गरेको थियो । अर्को चर्चित हाइ प्रोफाइल कारोबार भनेको संगीत पहिचान गर्ने सफ्टवेयर कम्पनी, ‘शाजम’ थियो जसलाई यसले २०१८ मा ४० करोड डलरमा खरिद गरेको हो । तर प्रायः एप्पलले साना प्राविधिक फर्महरु किन्ने गेको छ । त्यसपछि तिनलाई आफ्नै उत्पादन नविकण गर्न प्रयोग गर्ने गर्दछ । यसको एउटा उदाहरण हो ‘प्राइम सेन्स’ । यो एक इजरायली ‘थ्रीडी सेन्सिङ’ कम्पनी हो जसकै प्रविधिले एप्पलको ‘फेस–आइडी’ निर्माण गर्न योगदान पुर्याएको थियो ।
एप्पलले लगानी गर्ने कम्पनीहरु विविध किसिमका रहेका छन् । गत वर्ष यसले आर्टिफिसियल इन्टेलिजेन्स (एआइ), भर्चुअल रियालिटी इभेन्ट बिजनेस, पेमेन्ट स्टार्ट–अप र पोडकास्ट बिजनेस लगायत विभिन्न थरीका कम्पनी खरिद गरेको थियो । यसपछि २०१९ मा एप्पलले आफैँ चल्ने, सेल्फ–ड्राइभिङ सटलफर्म, ‘ड्राइभ.एआइ’ खरिद गरेको हो । यसले सेल्फ ड्राइभिङ सम्बन्धी एप्पलकै प्रविधिको विकासलाई बढावा दिनेछ ।
एप्पलको कम्पनी मूल्य हाल २० खर्ब डलर बराबर रहेको छ । त्यसकारण पनि यससँग नयाँ नयाँ फर्ममा हात हाल्न प्रशस्तै पैसा छ । तर ६ वर्षमा १०० वटा कम्पनी खरिद गरिसकेको भएपनि यस काममा एप्पलले ध्यानपूर्वक छनोट गर्ने गरेको छ । जस्तै केही समय अगाडि टेस्लाका मालिक एलन मस्कले २०१३ मा आफू संघर्षरत् अवस्थामा हुँदा कुकलाई आफ्ना विद्युतीय कार खरिद गर्न भनेको तर कुकुले नमानेको खुलासा गरेका थिए ।
एप्पल जस्तै अन्य ठूला कम्पनीहरुले पनि आफ्नो प्रविधि विस्तार गर्न विभिन्न किसिमका कम्पनीहरुमा लगानी गर्ने गरेका छन् ।
माइक्रोसफ्टले यसअघि लिंकेडिनका लागि २६ अर्ब तिरेको थियो भने अमेजोनले होल फुड्सलाई १३.७ अर्बमा किनेको हो ।
त्यस्तै फेसबुकले वाट्सएपलाई १९ अर्ब डलर तिरेर आफ्नो बनाएको थियो । यसमा एप्पलले खरिद गरेका दश सबैभन्दा ठूला कम्पनीलाई मिलाउँदा पनि यिनीहरु भन्दा धेरै कम हुन्छ ।
