नेकपा (एमाले)का अध्यक्ष खड्गप्रसाद ओलीले गर्ने व्यवहार र बोलीमा धेरै अन्तर छ भन्ने कुरा सर्वविदित्तै छ । पछिल्लोपटक प्रधानमन्त्री रहँदा ओलीले बोल्ने एउटा र अर्कै व्यवहार देखाउन गरेको गतिविधि छरपष्ट भएको थियो ।
ठीक यस्तै फेरि ओलीको व्यवहार र बोली बाझिएको छ । एमाले चुनाव एक्लै लड्छ भन्दै सार्वजनिक मञ्चहरुमा मन्तव्य दिँदै आएका ओली नेतृत्वको एमाले अन्तत गठबन्धनमा चुनाव लड्ने भएका छन् ।
बिहीबार जनकपुरधाममा संयुक्त पत्रकार सम्मेलनको आयोजना गरी एमाले र लोसपाले चुनावी गठबन्धन घोषणा गरेको हो ।
लोकतान्त्रिक समाजवादी पार्टी नेपालको तर्फबाट प्रदेश अध्यक्ष जितेन्द्र सोनल र नेकपा एमालेको तर्फबाट प्रदेश अध्यक्ष रामऔतार यादवले सहमतिपत्रमा हस्ताक्षर गरेका हुन् । लोसपासँगको गठबन्धनपछि एमालेकी विनादेवीले उम्मेदवारी फिर्ता लिएकी छन् ।
राष्ट्रियसभा निर्वाचनमा मधेश प्रदेशका जनताको चाहना र भावनालाई मध्यनजर गर्दै नेकपा एमाले र लोकतान्त्रिक समाजवादी पार्टी नेपालबिच सहमति भएको बताइएको छ ।
सहमतिअनुसार अन्यतर्फ नेकपा एमालेका उम्मेदवार उसमान अंसारी (सूर्य छाप) र महिलातर्फ लोकतान्त्रिक समाजवादी पार्टी नेपालका उम्मेदवार रुपा कुमारी यादव (साईकल छाप) लाई मतदान गर्न राष्ट्रिसभाका मतदातासँग अपिल गरिएको छ ।
गठबन्धन घोषणा कार्यक्रममा नेकपा एमालेका सचिव रघुवीर महासेठ र पोलिटब्युरो सदस्यद्वय जुली महतो तथा पूर्वमन्त्री लीलानाथ श्रेष्ठलयागतका नेताहरुको उपस्थिती रहेको थियो ।
राष्ट्रियसभा सदस्य चुनावका लागि मधेस प्रदेशमा दुई पदमा ४ दलबाट ६ जनाको उम्मेदवारी परेको छ ।
चुनावी प्रतिस्पर्धाका लागि सत्तारूढ गठबन्धनको तर्फबाट नेकपा (माओवादी केन्द्र) र जसपाले १/१ जना र लोकतान्त्रिक समाजवादी पार्टी (लोसपा) तथा नेकपा एमालेबाट २÷२ जनाले मनोनयन दर्ता गराएका थिए ।
सत्तारुढ गठबन्धनबाट नेकपा माओवादी केन्द्रकी उर्मिला अर्यालले महिला कोटामा उम्मेदवारी दिएकी छन् । यस्तै, जसपाबाट अन्य समूह कोटामा सिरहाका मोहम्मद खालिद सिद्धिकीले मनोनयन दर्ता गराएका छन् भने लोसपाबाट महोत्तरीकी रूपा यादव महिला कोटामा उम्मेदवारी दिएकी छन् ।उज्यालो अन्लाईन बाट
