प्युठान राष्ट्रीय अपाङ्ग सेवा संघ प्यूठानको आयोजना तथा सामाजिक विकास डिभिजन कार्यालय प्यूठानको सहयोगमा सि.वि. आर. कार्यक्रम अंतरगत अपाङ्गतामैत्री भौतिक संरचना निर्माण विषयक सरोकारवाला बीच अन्तरक्रिया कार्यक्रम झिम्रुक गाउँपालिकामा सम्पन्न भएको छ।
अन्तरक्रिया कार्यक्रममा जिल्ला समन्वय समिति प्युठानका प्रमुख धरम बहादुर जिसीले अपाङ्गता भएका व्यक्तिहरूको सवालमा सबै जिम्मेवार बन्न आग्रह गर्नुभएको थियो। उहाँले सबै संरचना अपाङ्गता मैत्री बनाउन आवश्यक रहेको बताउँदै जिल्ला समन्वय समिति बाट आवश्यक सहजीकरण र समन्वय गर्न तयार रहेको बताउनुभयो।
कार्यक्रममा झिम्रुक गाउँपालिकाका अध्यक्ष पित बहादुर एमसीले अपाङ्गता भएका व्यक्तिको समग्र विकासको लागि गाउँपालिका तयार रहेको भन्दै अपाङ्गता भएका व्यक्तिहरूले आफ्ना सवालहरू निरन्तर उठान गर्न आवश्यक रहेको बताउनुभयो। साथै गाउँपालिका भित्र बन्ने संरचना अपाङ्गता मैत्री बनाउन पहल गरिने बताउनुभयो ।
सामाजिक विकास डिभिजन कार्यालयका प्रमुख पुण्य प्रसाद न्यौपानेले अपाङ्गता भएका व्यक्तिको सवालमा सबै पक्ष को महत्वपूर्ण भूमिका हुने भन्दै सकारात्मक सहयोग गर्नपर्ने बताउनुभयो। उहाँले डिभिजन कार्यालय सधैं साथमा रहेको उल्लेख गर्नुभयो। उहाँले भन्नुभयो सीमित स्रोत र साधनका बीच सामाजिक गतिविधि भइरहेका छन् यस्ता सामाजिक गतिविधिलाई अगाडि बढाउन स्थानीय सरकारको महत्वपूर्ण भूमिका रहने बताउनुभयो
अन्तरक्रिया कार्यक्रममा राष्ट्रिय अपाङ्ग महासङ्घ लुम्बिनी प्रदेशका सचिवालय सदस्य जुमान सिंह केसीले अपाङ्गता मैत्री भौतिक संरचना निर्माण सम्बन्धमा कानुनी व्यवस्था र जिल्ला तथा पालिकाको संरचनाको अवस्था बारेमा कार्यपत्र प्रस्तुत गर्नुभएको थियो।
कार्यक्रममा गाउँपालिकाका जनप्रतिनिधि, वडा अध्यक्ष, विभिन्न सङ्घसंस्थाका प्रतिनिधि, पालिकाका विभिन्न शाखा प्रमुख र अपाङ्गता भएका व्यक्तिको सहभागिता रहेको थियो।
कार्यक्रमको अध्यक्षता राष्ट्रिय अपाङ्ग सेवा सङ्घ प्युठानका सदस्य कृष्ण बहादुर जिसीले गर्नुभएको थियो भने सञ्चालन महिला तथा बालविका शाखा प्रमुख शर्मिला बिकले गर्नुभएको हो।
