प्यूठान । प्यूठान अस्पताल विकास समितिका अध्यक्ष कृष्ण प्रसाद बसेलले अलपत्र निर्माणाधिन प्यूठान अस्पतालको निर्माण कार्यलाई पूर्णता दिन पहल गर्ने बताउनु भएको छ । सोमवार अस्पताल विकास समितिको अध्यक्ष पदको पदभार ग्रहण गर्दै उहाँले आफ्नै कार्यकालमा अस्पताल भवन निर्माणकार्यलाई पूर्णता दिने बताउँनु भएको हो ।
“निर्माण कम्पनीले काम नगर्ने हो भने कानुनी प्रक्रिया पुरा गरेर भएपनि हामी काम अगाडी बढाउँछौं” अध्यक्ष बसेलले भन्नुभयो, “मेरै कार्यकाल भित्र अस्पताल निर्माणको कार्यले पूर्णता पाउँनेछ ।” अस्पताल भित्र धेरै समस्याहरु देखिएको र समस्या समाधान गर्नका लागि समितिले अग्रसर भएर काम गर्ने उहाँको भनाई थियो । “सुविधा सम्पन्न अस्पताल नीजि मेडिकल होईनन्” उहाँले भन्नुभयो, “आवश्यक जनशक्तिको व्यवस्थापन गर्दै गुणस्तरीय स्वास्थ्य सेवा प्रवाहमा हाम्रो पहल र समन्वय रहने छ ।”
नागरिकलाई सर्वसुलभ स्वास्थय सेवा प्रवाह र अस्पतालको सुधारका लागि समितिले काम गर्ने उहाँले बताउनुभयो । पदभार कार्यक्रममा प्यूठान अस्पतालका मेडिकल सुपरिटेन्डेन्ट ओम अर्याल सहित अस्पतालमा कार्यरत कर्मचारी, विभिन्न स्थानीय तहका प्रतिनिधि लगाएतले बधाई ज्ञापन गर्दै अस्पताल सुधारका लागि सुझाब राखेका थिए ।
पदभार ग्रहण पूर्व अध्यक्ष बसेलले रक्त संचार सेवा केन्द्र विजुवारमा रक्तदान समेत गर्नुभएको थियो ।
