जुमान सिह के.सी.
प्यूठान । आप्रवासि तथा उनका दम्पत्तिलाई केन्द्रित गरि जिल्लामा संचालित एच.आई.भी.रोकथाम कार्यक्रम अन्तरगत जिल्ला स्तरीय सरोकारवाला समन्वय वैठक सम्पन्न भएको छ । स्वास्थ्य कार्यालय प्यूठानको सभाहल विजुवार प्यूठानमा सोमवार कार्यक्रम गरिएको हो ।
स्वास्थ्य कार्यालय प्यूठानका निमित्त प्रमुख मधुसुदन खड्काको अध्यक्षतामा सम्पन्न समन्वय वैठकमा जिल्ला समन्वय समिति प्यूठानका प्रमुख धरम बहादुर जिसीको प्रमुख आथिथ्यता तथा प्रमुख जिल्ला अधिकारी दिपकराज नेपालको विशेष आतिथ्यता रहेको थियो ।
कार्यक्रममा परियोजना अन्तरगत संचालित क्रियाकलापले एच.आई.भी.पहिचान तथा उपचार पद्धतिमा समावेश गराउनका लागि महत्वपूर्ण योगदान गर्दै आएको सरोकारवाला निकायहरुले औलाएका थिए । कार्यक्रममा प्रमुख अतिथि धरम बहादुर जिसीले परियोजनाले विगतदेखि संक्रमितको पहिचान देखि उपचार पद्धति सम्ममा महत्वपूर्ण योगदान दिदै आएको बताउनुभयो । अझैपनि खुलेर एच.आई.भी.परिक्षण गर्ने संख्या न्यून रहेको बताउँदै उहाँले सामाजिक व्यवहार र दृष्टिकोट परिवर्तन आवश्यक रहेको बताउनुभयो।
कार्यक्रममा प्रमुख जिल्ला अधिकारी दिपकराज नेपालले स्थानीय तहसंगको समन्वमा कार्यक्रम संचालन गर्दा वढी प्रभावकारी हुने बताउनुभयो । प्यूठान अस्पत्तालका मेडिकल सुपरिटेन्डेन्ट ओम अर्यालयले सवैपक्षको आवश्यक सहकार्यबाट मात्रै एच.आई.भी.न्यूनिकरण सम्भव रहेकोले सवैपक्षले यसलाई जोड दिनुपर्ने बताउनुभयो ।
सवै सरोकारवाला पक्षको समन्वयवाट मात्रै एच.आई.भी. रोकथाम सम्भव हुने गैरसरकारी संस्था महासंघ प्यूठानका अध्यक्ष विजय कुमार श्रेष्ठले सुझाव राख्नुभयो । परिक्षणको दायरामा आउन र पहिचान भएका कतिपय केष समेत उपचार पद्धतिमा आउनका लागी हिचकिचावट गर्ने दर अझै कायम रहेकोले यस सम्वन्धी सकारात्मक धारणा विकास गर्नुपर्ने आवश्यकता रहेको उहाँको भनाई छ ।
समन्वय वैठकमा परियोजना अन्तरगत जिल्लामा संचालन हुने क्रियाकलापका सन्दर्भमा कार्यक्रमका परियोजना अधिकृत प्रज्वल पहाडीले जानकारी गराउनु भएको थियो । घरदैलो र एचआईभी स्क्रिनिङ्ग क्याम्प मार्फत लक्षित समुहमा व्यवहार परिवर्तन शिक्षा, एच.आई.भी. परिक्षण, टीवि स्क्रिनिङ्ग,कण्डम वितरण जस्ता कार्यक्रमहरु संचालन हुने उहाँले बताउनु भयो । कार्यक्रममा स्वास्थ्य कार्यालय प्यूठानका एच.आई.भी. फोकल पर्सन राजु खड्काले समन्वय वैठकको उद्येश्य वारे प्रकाश पार्नुभएको थियो ।
ग्लोवल फण्डको आर्थिक सहयोग, यूएनडिपि संगको सहकार्यमा राष्ट्रिय एच.आई.भी. तथा एड्स महासंघ नेपाल मार्फत जिल्लामा कार्यक्रम कार्यान्वयन हुदै आएको छ ।
