प्युठान । प्यूठान उद्योग वाणिज्य संघ प्यूठानका पुर्व अध्यक्ष ज्ञामुराम न्यौपाने र उहाँकी पत्नी उद्योग वाणीज्य संघ गौमुखी बजार इलाकाका अध्यक्ष कमला पोखरेलले उद्योग वाणिज्य संघ गौमुखी बजार इलाकालाई निशुल्क जग्गा प्रदान गर्नु भएको छ । गौमुखी गाउँपालिका ५ ठूलावेसी बजार केन्द्रमा पर्ने १३० बर्गमिटर (४आना) क्षेत्रफलको जग्गा बजार इलाकाको भवन निर्माण प्रयोजनका लागी निशुल्क प्रदान गर्नु भएको हो ।
स्थानीय चलन चल्ती अनुसार झण्डै १३ लाख ६० हजार बरावरको जग्गा बजार ईलाकालाई हस्तान्त्रण गरेको प्यूठान उद्योग वाणिज्य संघका कार्यकारी निर्देशक प्रकाश खनालले बताउँनुभयो । उहाँले निशुल्क जग्गा प्रदान गर्नु समुदायप्रतिको ठूलो योगदान रहेको बताउनुभयो ।
समाजसेवी न्यौपानेले केही समय अगाडी संघको “सचिवालय भवन निर्माणका लागि आवस्यक पर्ने जग्गा निशुल्क प्रदान गर्ने घोषणा गरे अनुसार जग्गा मालपोत कार्यालय प्युठानबाट सोमवार संघको नाममा जग्गा उपलब्ध गराएको बताउनुभयो । सोमबार मालपोत कार्यालय प्युठानबाट गौमुखी बाजार क्षेत्रको नाममा रजिस्टेसन पास गरि बजार क्षेत्रका उपाध्यक्ष कृष्ण मल्ललाई लालपुर्जा उपलब्ध गराएको न्यौपानेले बताउनुभयो। निशुल्क जग्गा प्राप्त भए संगै इलाकालाई अब भवन निर्माणकार्य गर्न बाटो खुलेको छ ।
गौमुखीका प्रतिष्ठित तथा सफल व्यवसायीको छवि बनाउनुभएका , सामाजिक तथा राजनैनिक क्षेत्रमा समेत सक्रिय न्यौपानेले गौमुखीका विभिन्न स्थानमा स्वास्थ्य चौकी, बिधालय, प्रतीक्षालय निर्माणका लागि जग्गा तथा आर्थिक सहयोग गर्दै आउनु भएको छ।
