नेपालगन्ज फागुन १६। बाँकेको नेपालगञ्जमा गुण्डा नाइके रिगल समूहबाट हत्या गरिएका चेतन मानन्धरकी श्रीमती भारती मानन्धरले औषधीको ओभरडोज लिएपछि अस्पताल भर्ना गरिएको छ।
मंगलबार दिउसो १ बजेको आसपास भारतीले औषधीको ओभर डोज लिएपछि बेहोस भएको र उनलाई उपचारका लागि नेपालगन्ज स्थीत भेरी अस्पताल भर्ना गरिएको बाँके प्रहरीले जनाएको छ।
नेपालगञ्जका सञ्चारकर्मी आशिष मल्ल ठकुरीका अनुसार छोरा पढ्ने विद्यालयले भारतीलाई छोरासँग भेट्न नदिएको र खाजासमेत फिर्ता गरिदिएपछि उनले आत्महत्याको प्रयास गरेकी हुन्।
स्थानीय क्रिष्टल बोर्डिङ स्कुलमा कक्षा ४ मा अध्ययनरत आफ्नो छोरालाई भेट्न र खाजा पुर्याउन भारती दैनिकरुपमा विद्यालयमा जाने गरेकामा मंगलबार विद्यालयले उनको खाजा दिन नमिल्ने भनी फिर्ता पठाएको थियो।
बालकको अभिभावकको नाममा हजुरबुवा र हजुरआमाको नाममात्रै रहेको भन्दै अभिभावकको नाम नरहेको अवस्थामा खाजा स्वीकार गर्न नसकिने भन्दै भारतीको खाजा फिर्ता पठाइदिएको थियो।
उनको अवस्था स्थिर रहेको बाँके प्रहरीले जनाएको छ। उनले आफ्नो छोरालाई भेट्न नपाएको भन्दै औषधीको ओभरडोज सेवन गरेको उनी निकटले सुनाएका छन्। घटनाको विषयमा अनुसन्धान भइरहेको बाँके प्रहरीले जनाएको छ।
राष्ट्रपतिबाट आममाफी पाएका रिगललाई लामो समय आन्दोलन गरेर पुनः जेल पठाउन सकेकी भारती पारिवारिक रुपमा समस्यामा पर्दै आएको जनाउँदै आएकी थिइन्। उनले छोरालाई आफैले राख्नुपर्ने चाहना गर्दै आएको भएपनि चेतनका बुबाआमाले भने नातीलाई आफैले राखेका छन्।
छोरालाई दिउसो खाजा दिन उनी पढ्ने स्कुलमा गएपनि भेट्न नपाएपछि घरमा आएर उनले औषधी सेवन गरेको उनको विषयमा जानकार रहेका पत्रकार आशिष मल्लले जानकारी दिएका छन्।
बाँके प्रहरीका सूचना अधिकारीले प्रहरीले दिउसो ४ बजे सूचना पाएको जनाएको छ। प्रहरीका अनुसार अहिले उनको स्वास्थ्यमा सुधार भइरहेको र परिवारका सदस्य पनि साथमा भएकाले घटनाको कारण अहिले नखोजिएको हो।