रामपुर (पाल्पा) । पाल्पाको रामपुरमा राष्ट्रिय जनमोर्चाले सङ्घीयता र भ्रष्टाचारको विरुद्ध कोणसभा सम्पन्न भएको छ ।

राजमो रामपुरको आयोजनामा २०८१ साउन २५ गते शुक्रबार उक्त कार्यक्रम सम्पन्न भएको हो ।

कार्यक्रमको प्रमुख अतिथि राजमो केन्द्रीय सदस्य सोमकुमार कार्की हुनुहुन्थ्यो ।

सो अवसरमा मन्तव्य राख्दै उहाँले सङ्घीयता र भ्रष्टाचार तात्कालिक राजनीतिको दुई प्रमुख समस्या भएको बताउनुभयो ।

उहाँले राजमोले यी दुवैका विरुद्ध भदौ महिनाभरि देशव्यापी कार्यक्रम आयोजना गरेको बताउनुभयो ।

भ्रष्टाचारका विरुद्ध सुशासन र सङ्घीयताका विरुद्ध प्रजातान्त्रिक विकेन्द्रीकरण र स्थानीय स्वायत्त शासनसहितको एकात्मक शासन राजमोको विकल्प रहेको उहाँको भनाइ थियो ।

कार्यक्रममा अखिल नेपाल महिला सङ्घकी केन्द्रीय सदस्य नरमती सिँजाली र राजमो पाल्पाका अध्यक्ष विशाल दर्लामीले पनि मन्तव्य राख्नुभएको थियो ।

कार्यक्रममा राजमो जिल्ला सदस्यहरू पदमबहादुर पौडेल, पहल सिंह र निरू सारूको पनि आतिथ्य रहेको थियो ।

राजमो जिल्ला उपाध्यक्ष मानबहादुर वयम्बुको अध्यक्षता तथा जिल्ला सदस्य रामप्रसाद गैरेको सञ्चालनमा अघि बढेको उक्त कार्यक्रममा सहभागी सम्पूर्णलाई नगर अध्यक्ष रामबहादुर आलेले स्वागत गर्नुभएको थियो ।