प्यूठान अपाङ्गतामैत्री भौतिक संरचना निर्माण विषयक एक दिवसीय अन्तरक्रिया कार्यक्रम आज खलंगामा सम्पन्न भएको छ । नेपाल दृष्टिविहिन उत्थान संघ रुपन्देहीको आयोजनामा कार्यक्रम सम्पन्न भएको हो ।
विभिन्न कार्यालयका प्राविधिक, निर्माण व्यवसायी, निर्माण कार्यमा संलग्न मिस्त्रि, पत्रकार लगायतको उपस्थितिमा कार्यक्रम भएको हो । कार्यक्रमको सहजिकरण गर्दै राष्ट्रिय अपाङ्ग महासंघ लुम्बिनी प्रदेशका सचिवालय सदस्य जुमान सिंह के.सी.ले अपाङ्गतामैत्री भौतिक संरचना निर्माण तथा सञ्चार सेवा निर्देशिका २०७९ बमोजिम अपाङ्गतामैत्री भौतिक संरचना निर्माण हुनुपर्नेमा जोड दिनुभयो ।
कानुन, ऐन, नियम भएपनि अझै पनि भौतिक संरचनाहरु अपाङ्गतामैत्री नहुँदा आवागमन, सहभागी तथा दैनिक कार्य गर्न समस्या भएको राष्ट्रिय अपाङ्ग सेवा संघ प्यूठानका अध्यक्ष हुनाराम खडकाले बताउनुभयो ।
डिजाईन इस्टिमेटमै अपाङ्गतामैत्री भएमा कार्यान्वयनमा सहज हुने भएकाले त्यस तर्फ जोड दिनुपर्ने निर्माण व्यवसायी संघ प्युठानका निवर्तमान अध्यक्ष पशुपति नारायण नकर्मीले उल्लेख गर्नुभयो ।
