दाङ दाङको तुलसीपुर १९ कुटेचौरमा निःशुल्क स्वास्थ्य शिविर संचालन हुदा स्वास्थ्यको पहुँच पुग्न नसकेका बिपन्न नागरिकले उपचार सेवा पाएका छ्न।
समाज कल्याण केन्द्र नेपाल, दाङले कुटेचौरस्थित जनजागरण माध्यमिक बिधालयमा शनिबार आयोजना गरेको निःशुल्क स्वास्थ्य शिविरमा वरिष्ठ स्त्री रोग विशेषज्ञ डा. प्रविण योगी र जनरल फिजिसियन डा. बाचस्पति सुवेदी, चेकजाच सहित औषधी र आवश्यक परामर्श दिएका हुन।
गाउँघरमा अझै पनि रोग लागेको थाहा नपाउने एदि लागि हालेमा पनि भन्न लजाउने परिपाटीका कारण रोग पालेर बस्ने समस्याले अकालमा ज्यान जाने जोखिम बढेपछि समाज कल्याण केन्द्र, नेपालले गाउँबस्तीका बिपन्न नागरिकको उपचारमा पहुँच पुर्याउन निः शुल्क स्वास्थ्य शिविर आयोजना गरेको केन्द्रका अध्यक्ष निर्मला गौतमले बताउनुभयो।
शिविरमा स्त्री रोग सेवा, जनरल उपचार सेवा र दन्त रोग उपचार सेवा प्रदान गरिएको थियो । जसमा १ सय ५० जनाले दन्त रोग सम्बन्धी सेवा, १ सय १७ जनाले फिजिसियन उपचार सेवा र १ सय २० जनाले स्त्रीरोग तथा प्रजनन सम्बन्धी औसधि उपचार सेवा लिएको समाज कल्याण केन्द्रले जनाएको छ।
समाज कल्याण केन्द्रले स्वास्थ्य सेवाबाट बन्चित भएका नागरिकको पहुँच वृद्धि गर्न, समस्या पहिचान गर्न र आर्थिक तथा सामाजिक रुपमा पछाडि पारिएका वर्गलाई सेवा दिने उदेश्य सहित विशेषज्ञ स्वास्थ्य शिविर संचालन गरिएको बताएको छ।
शिविरमा उपचारका लागि आएका मध्ये अधिकांश महिलाहरुमा यौन तथा प्रजनन् स्वास्थ्य समस्या पहिचान भएको वरिष्ठ स्त्री रोग विशेषज्ञ डा. प्रविण योगीले बताउनुभयो।
शिविर उद्घाटन कार्यक्रममा लुम्बिनी प्रदेशका उद्योग पर्यटन तथा यातायात मन्त्री प्रचण्डविक्रम न्यौपानेले समुदायमा रोग लुकाएर बसेकाहरुलाई स्वस्थ मानव निर्माण गर्ने अभियानले निरोगी बनाउन सघाउने बताउनुभयो । पछिल्लो समय नसर्ने रोगका कारण मानिसको जीउज्यानको जोखिम बढ्दै गएको तथा आर्थिक नोक्सानी हुने अवस्था सिर्जना भएको हुँदा हरेकले नियमित स्वास्थ्य जाँच गराउन आवश्यक रहेको बताउनुभयो ।
समाज कल्याण केन्द्रले दूरदराजका नागरिकको स्वास्थ्य उपचारमा पहुँच पुर्याउँदै सचेतना जगाउने प्रयास सराहनीय रहेको भन्दै अभियानलाई निरन्तरता दिन आग्रह समेत गर्नुभयो ।
शिविर उद्घाटन कार्यक्रमको अध्यक्षता संस्थाका अध्यक्ष निर्मला गौतमले गर्नु भएको थियो भने केन्द्रक उपाध्यक्ष निरजा पोख्रेलको स्वागत मन्तव्यबाट शुरु भएको कार्यक्रमको संचालन केन्द्रका सचिव जानका केसीले गर्नुभएको थियो ।
