अनुज पछाई , प्यूठान । बैशाख ३० गते हुने स्थानीय तह निर्वाचनका लागि प्यूठानमा ३१ सय बढीले म्यादी प्रहरीमा आवेदन दिएका छन् । जिल्लामा १२ सय ४८ जना म्यादी प्रहरीको माग गरिएकोमा आइतबारदेखि शुक्रबार अन्तिम दिनसम्म ३ हजार १ सय ७४ जनाले आवेदन दिएका हुन् ।
जिल्ला प्रहरी कार्यालय प्यूठानका प्रवक्ता तथा प्रहरी निरीक्षक देबी प्रसाद गैरेका अनुसार ७१६ महिला र २ हजार चार सय ५८ जना पुरुषले आवेदन दिएका छन् । आउँदो वैशाख ३० गते हुने स्थानीय तह निर्वाचनका लागि म्यादी प्रहरीको भर्ना खुलेको थियो ।
१८ वर्ष पूरा भएका र ५४ वर्ष ननाघेका इच्छुक व्यक्तिले म्यादी प्रहरीमा आवेदन दिन सकिने प्रावधान छ । ४० दिनका लागि म्यादी प्रहरीमा भर्ना हुने म्यादी प्रहरीले प्रहरी जवानसरह नै सेवा सुविधा पाउनेछन् । छनोट भएका म्यादी प्रहरीलाई ७ दिन तालिम दिएर चुनावको सुरक्षामा खटाइने छ । म्यादी प्रहरीको प्रशिक्षण आउँदो २८ गतेदेखि सुरु हुदैंछ ।
म्यादी प्रहरीले दिनको सात सय ५६ रुपैयाँका दरले तलब पाउनेछन् । ४० दिनको ७ हजार रुपैयाँ रासन भत्ता, पोसाक भत्ता ६ हजार र एक हजार रुपैयाँ यातायात खर्च पाउने छन् । त्यस्तै देशभरका ७७ वटै जिल्लामा स्थानीय चुनावका लागि एक लाख जना म्यादी प्रहरी माग गरिएको छ ।