अनुज पछाई ,प्यूठान । प्यूठानमा ब्रोइलर कुखुराको मासुको मूल्य वृद्धि भएको छ । विजुवार बजारमा केही सातायता मासुको मूल्य प्रतिकिलोग्राम ५० देखि ७० रुपैयाले ले वृद्धि भएको हो ।
अहिले विजुवार बजारमा ब्रोइलरको मासु प्रतिकिलोग्राम ४२० पुगेको छ । सहज रूपमा ब्रोइलर कुखुरा उपलब्ध हुन छाडेपछि मासुको मूल्य वृद्धि हुँदै गएको स्थानीय व्यवसायी बताउँछन् । जिल्लाभित्र ब्रोइलर कुखुरा पाउन छोडेपछि अहिले रुपन्देहि तथा चितवनबाट आयात गरेर मासु बिक्री गर्दै आएको उनीहरूको भनाइ छ ।
विजुवार बजारका मासु व्यवसायी दिनेश बस्नेतले अन्य ठाउँबाट ब्रोइलर कुखुरा ल्याएर मासु बिक्री गर्दै आएको जानकारी दिए । हाल वृद्धि भएको मूल्यमा पनि उपभोक्ताको मागअनुसार ब्रोइलरको मासु उपलब्ध गराउन नसकेको उनले बताए ।
विजुवार बजारकै व्यवसायी मनोज सुनारले पनि ब्रोइलर कुखुरा पाउन छोडेपछि मासुको मूल्य वृद्धि भएको बताए । दाङबाट कुखुरा आयात गर्नुपरेको बताए । रोल्पा दाङमा पनि मागअनुसार कुखुरा पाउनै मुस्किल पर्ने गरेको उनको भनाइ छ ।
व्यवसायी नेत्र न्यौपानेले जिल्लामा ब्रोइलर कुखुरा नपाएपछि मासु बिक्री गर्न छाडेको र अहिले स्थानीय जातका कुखुराको मासु मात्र बिक्री गर्दै आएको बताए । हाल लोकल कुखुराको मासु प्रतिकिलोग्राम ७०० ले बिक्री गर्ने गरिएको छ ।
अर्का व्यवसायी सुजन श्रेष्ठले कुखुरा पाउन छोडेपछि मासु बिक्री गर्न छोडेको जानकारी दिए । यसरी विजुवार बजारका अधिकांश फ्रेस हाउस तथा बोइलर मासु बिक्री केन्द्र हिजोआज बन्द भएका छन् ।
सीमित फ्रेस हाउस सञ्चालनमा रहेपनि उनीहरूले मासु महँगोमा बिक्री गर्दै आएका छन् । सहजरूपमा बोइलर कुखुरा नपाएकै कारण मासुको मूल्य वृद्धि भएको उनीहरूको भनाइ छ । मूल्य महँगो भएपनि व्यवसायीले उपभोक्ताको मागअनुसार बोइलरको मासु उपलब्ध गराउन सकिरहेका छैनन् ।