बागलुङबजार । राष्ट्रिय जनमोर्चा बागलुङको अध्यक्षमा तिलक थापा (तेजबहादुर थापा) चयन हुनुभएको छ ।

२०८० भदौ ७ गते बिहीबार बागलुङबजारमा बसेको राजमो जिल्ला समितिको बैठकले सो निर्णय गरेको हो ।

राजमो जिल्ला समितिका अनुसार गत २०७९ फागुन २७ र २८ गते सम्पन्न सातौँ जिल्ला सम्मेलनबाट निर्वाचित अध्यक्ष राजेन्द्र ढुङ्गानाले बैठकमा जिम्मा परिवर्तन गर्ने प्रस्ताव राख्दै आउनुभएको थियो ।

बैठकले निवर्तमान जिल्ला अध्यक्ष ढुङ्गाना जिल्ला सल्लाहकारमा चयन गरेको पनि बताइएको छ ।

त्यस्तै, बैठकले वडास्तरसम्म राजमोको सङ्गठनात्मक अभियान सञ्चालन गर्ने निर्णय गरेको समाचार छ । सो अभियान आगामी भदौ १६ गते शनिबारदेखि असोज २७ शनिबारसम्म चल्ने छ ।

बैठकले गरेका विविध निर्णयका विषयमा जानकारी दिन भोलि भदौ ८ गते पत्रकार सम्मेलन गर्ने योजना रहेको जिल्ला समितिले जानकारी दिएको छ ।