परासी असोज २५ जिल्ला प्रहरी कार्यालय नवलपरासीले नक्कली नोट छाप्ने मेशिन सहित दुई जनालाई पक्राउ गरेको छ। नवलपरासीको बर्दघाट बजारको विनय होटल एण्ड रेष्टुरेण्टबाट १ लाख ३९ हजार नक्कली नोटसहित बुधबार दुई जनालाई पक्राउ गरेको थियो।
पक्राउ परेका व्यक्तिहरु सँगको सोधपुछमा उनीहरुले नक्कली नोट छाप्ने मेसिन समेत राखेको बताएपछि बिहीवार मेसिन बरामद गरेको प्रहरीले जनाएको छ। समयचक्रबाट
पक्राउ पर्नेहरुमा तनहुँ ऋषिङ्ग गाउँपालिका ३ बस्ने २५ वर्षिय सुरज वि.क. र पूर्वी नवलपरासी बुलिङ्टार गाउँपालिका-६ ठिमुरे बस्ने ३० वर्षिय कृष्णबहादुर विश्वकर्मा छन्।
पक्राउ परेकाहरुको बयानको आधारमा बुटवलको अन्नपूर्ण खाना तथा खाजा घरबाट मेसिन बरामद भएकोे जिल्ला प्रहरी कार्यालय नवलपरासीका प्रमुख प्रहरी उपरीक्षक काजी कुमार आचार्यले जानकारी दिए।
१ हजार दरका नक्कली नोटसहित पक्राउ परेका उनीहरुबाट नोट बनाउनका लागि प्रयोग हुने कागज, स्ट्याम्प प्याड, स्केल लगायतका सामानसमेत बरामद गरिएको प्रहरीले जनाएको छ।
मोबाइल फोन बन्द गरेर वाट्सएपबाट कुराकानी गर्दै आएका उनीहरुलाई महिला प्रहरीमार्फत हनी-ट्रयापमा पारेर पक्राउ गरिएको प्रहरीले जनाएको छ।
लामो समयदेखि भारतको मुम्बईमा बस्दै आएका उनिहरु चाडपर्वको मौका पारेर नेपाल आएको प्रहरीले जनाएको छ। यसैबीच नक्कली नोट बनाउने गिरोह नै रहेको प्रहरीले जनाएको छ।
बुधबार नै उनीहरुकै समूहमध्येका २ जना तनहुँमा पक्राउ परेको प्रहरी उपरीक्षक आचार्यले बताए। अनुसन्धानमा अहिलेसम्म ४ जना रहेको पाइएको उनले बताए।
नक्कली नोट बजारमा साटेर सक्कली लिनका लागि लुम्बिनी प्रदेश र गण्डकी प्रदेशका बजार क्षेत्रलाई लक्षित गरेर उनीहरु दुई समुहमा विभाजन भएको प्रहरीले जनाएको छ।
उक्त गिरोहले एकहजारको नक्कली नोट दिएर पसलबाट १ सयको सामान किन्ने र ९ सय सक्कली नोट लिँदै हिड्ने गरेको प्रहरी उपरीक्षक आचार्यले बताए। पक्राउ परेकाहरुलाई मुद्रा सम्बन्धी कसुरमा मुद्दा चलाइएको प्रहरीले जनाएको छ।
