बिमल पोख्रेल
लुम्बिनी प्रदेशले कर्मचारीलाई महिनावारी विदा दिने भएछ । यो विदा शिक्षकलाई लागु हुन्छ कि हुँदैन ? रातदिन नभनीकन बन्दुक बोकेर ड्युटीमा खट्ने सेना, सशस्त्र र प्रहरीलाई विदा चाहिंदैन ? बैंक र वित्तीय संस्थाका कर्मचारीलाई लागू हुन्छ कि हुँदैन ? अनि महिला सांसद र मन्त्रीहरूले महिनावारी विदा पाउँछन् कि पाउँदैनन् हौ यो देशमा ? कर्मचारीलाई विदा दिइएपछि सांसद र मन्त्रीलाई पनि त विदा दिनुपर्ने होला नि ! डाक्टर, नर्सलाई के गर्ने नि ? मानौं कुनै डाक्टरले अपरेसन गर्नुपर्ने भयो, अपरेसनको मिति पहिल्यै दिइएको हुन्छ । अब महिनावारी भएँ भनेर अपरेसन रोकिदिने ?
अर्को कुरा, विद्यालय र क्याम्पस पढ्ने महिला विद्यार्थीहरूलाई पनि विदा गर्ने होला नि होइन ? महिनावारीको बेला विवाह भएकाहरू भन्दा नभएका विद्यार्थीलाई नै दुखाइ धेरै भएको देखिन्छ । तिनीहरूलाई पनि त विदा चाहियो नि ! अब सबैले छोरीहरूलाई महिनावारी भएको बेला विद्यालय नजाउ, नपढ भनिदिउँ ? गर्न खोज्या यही हो ?
कर्मचारीलाई विदा दिने, शिक्षक, सेना, प्रहरीलाई किन नदिने ? कामको हिसाबले हेर्ने हो भने कर्मचारीको भन्दा सेना, प्रहरी र शिक्षकको खटनपटन दशौं गुणा धेरै हुन्छ । अनि विद्यार्थीलाई किन नदिने ? तिनीहरू त झन् खाई नखाई विद्यालय, कलेज जान्छन् । कि कर्मचारीबाहेक अरु महिलाहरू महिनावारी हुँदैनन् ? गर्न र भन्न खोज्या के हो ?
यदि महिनावारी विदा नै दिने हो भने राष्ट्रपति, प्रधानमन्त्री, मन्त्री, सांसद, प्राध्यापक, शिक्षक, कर्मचारी, सेना, प्रहरी, विद्यार्थी सबैलाई दिउँ । त्यो विदा कत्तिको व्यवहारिक हुन्छ विश्लेषण गरौं । अध्ययन गरौं, अनुसन्धान गरौं । दिनैपर्ने भए दिउँला नि ।
सस्तो लोकप्रियताले देश बन्दैन,महिला-पुरुष समानता पनि हुँदैन । त्यो नक्कली नौटंकी हो । सांसद, मन्त्री, शिक्षक, कर्मचारी, सेना, प्रहरी, सशस्त्र प्रहरी र विद्यार्थीको विभेद हुने गरी ल्याइएको लुम्बिनी प्रदेशको नौटंकी बन्द गर्दा हुन्छ । यस्तो नौटंकीले कुनै प्रतिफल दिनेवाला छैन ।
बिमल पोख्रेल अखिल छैठौंका पुर्ब अध्यक्ष तथा हालका अधिवक्ता हुनुहुन्छ ।
